Polis Komisina David Manning i amamas long Edukesen Dipatmen long kamapim wanpela nupela skul sabjek o kos bilong ol sumatin long lainim long skul.

Dispela sabjek em Sitisensip na Kristen Veliu Karikulum na Edukesen Dipatmen i mekim dispela sabjek i kamap wankain olsem Mets na Ingils sabjek. Dispela sabjek bai helpim long daunim sampela ol lo na oda hevi na ol hevi  bilong Jenda Beis Vailens (GBV) long kantri.

“Mi tok tenkyu long Edukesen Dipatmen long karim Sitisensip na Kristen Veliu Karikulum i go insait long ol skul. Dispela bai helpim long daunim ol hevi insait long kantri taim ol pikinini i lainim dispela sabjek long skul. Ol pikinini bai gro wantaim gutpela tingting na dispela i bai bringim oda i go long ol komyuniti bilong yumi na ol mama, ol sista na ol pikinini meri bai pilim seif gen,” Mista Manning i tok.

Em i tok hevi bilong COVID-19 i bin kamapim planti moa hevi long kantri olsem GBV.

“Taim ol polis i wok long painim ol man husat i kamapim birua, em i wokmak bilong ol sitisen na ol institusen bilong kantri tu long daunim GBV na ol arapela vailens,” Mista Manning i tok.

Seketeri bilong Edukesen, Dokta Uke Kombra i tokaut long dispela Sitisensip na Kristen Veliu Karikulum long bung bilong Edekesen na Gavana. Dokta Kombra i toktok long wanem Edukesen Dipatmen i wok long mekim long daunim jenda vailens.

“Edukesen Dipatmen i luksave long hevi bilong GBV na ol arapela vailens olsem na long daunim dispela ol hevi insait long kantri, Edukesen Dipatmen i mekim Sitisensip na Kristen Veliu sabjek i kamap kompalsari o wankain olsem Mets, Saiens na Inglis,” Dokta Kombra i tok.

Em i tokim ol Gavana tu olsem long prep i go long gret 6, ol sumatin i lainim dispela sabjek i stap nau na ol gret 7 i go long gret 12 bai stat long lainim long 2021.

“Dispela i kamap long givim gutpela tingting long ol yangpela. Tasol salens bilong mipela nau em long trenim ol tisa long lainim ol sumatin long dispela sabjek. Mipela i gat narapela tingting tu long kisim ol pasto i kam na trenim ol long lainim ol sumatin,” Dokta Kombra i tok.

Rebecca Negere i raitim