Yangpela loya meri, Emma Minimbi i amamas long helpim ol manmeri insait long komyuniti bilong en long Minj, Jiwaka Provins.

Em i tok, em i painim amamas taim em i sindaun wantaim ol manmeri long ples bilong en na toktok long ol long ol lo bilong sosaiti.

“Planti taim mi save sindaun na harim ol viles kot long ples bilong mi na toktok na skulim ol traib bilong mi long ol rait na risponsibiliti bilong ol.

“Mi yet em namba wan meri insait long hauslain bilong mi long kamap loya na kisim post greduet namba. Mi soim ol hauslain bilong mi long pasin na eksen bilong mi olsem ol meri i ken kamapim bikpela samting long laip bilong ol sapos ol i putim tingting bilong ol long wanem ol i laik mekim,” Emma Minimb i tok.

Emma i gat ekspiriens olsem loya long tripela krismas bipo long em i skul long kisim Masta bilong en long Pablik na Intanesenel Lo Kendidet long Yunivesiti bilong Melbourn long 2019 na dispela yia 2020. Em i gat save long lukautim kot keis, givim gutpela tingting bilong lo long ol manmeri, helpim long sait bilong lo na ol arapela olsem stretim krospait.

Em i stap olsem wanpela volintia wantaim voluntia kaunsol sevis long 2017 i kam inap nau. Em i stap olsem wanpela ektivis tu wantaim Amnesty International. Long dispela taim, em i mekim awenes long sosel midia long diskriminesen o bagarapim ol man nating nating, abyus bilong human rait na pasin bilong stopim fridom. Em i wok long senisim wol isi isi.

Taim em i senisim wok olsem loya i go long post greduet program, em i tok, “Nogat planti lain bai kisim gutpela tingting long ol disisen yu mekim long laip bilong yu. Tasol mi mekim dispela disisen long lusim loya wok bilong mi long bikpela lo bisnis long kisim dispela post greduet namba long i go bek gen long ples bilong mi na voluntia long givim taim na save bilong mi long wanpela liklik non-gavman ogenaisesen long Minj, Jiwaka provins.”

Emma i tok, papa bilong en tu i bin askim em bilong wanem em i lusim gutpela wok bilong en.

“Bikos mi laik helpim ol pipel na mi no laikim mani. Sapos mi no mekim husat bai mekim? Sapos nau senis i no kamap, wanem taim bai senis i kamap?” Emma i  bin bekim tok olsem.

Em i strongim ol meri long no ken rausim tingting bilong ol long ol driman ol i gat long en, noken bihainim tingting na laik bilong sosaiti o wanem kain wok ol i gat, nogat. Tasol ol i mas mekim wanem samting i save mekim ol i amamas.