WOK bilong imunaisesen (immunisation) o bebi sut nau i ken i go het gut long 8-pela distrik long Isten Hailans wantaim helpim bilong wanpela lokal kampani.

Sastenibel Menesmen Sevis (SMS) husat i save wok aninit long lukaut bilong Deputi Kantri Menesa bilong Monpi Coffee Exports kampani Alenjandro Kontreras i tokaut long dispela taim kampani i sainim wanpela Memorandum ov Agrimen (MoA) wantaim Isten Hailans Provinsal Helt Atoriti (EHPHA) long las wik.

Em i tok kampani i luksave long bikpela helpim bilong program na i redi long helpim.

EHPHA wantaim Wol Helt Ogenaisesen i bin kamapim wanpela imunaisesen trening woksop i kamap las wik we moa long 50 helt woka long gavman na Kristen helt sevis i kisim trening.

Sif Ekseketiv Opisa (CEO) bilong Provinsal Helt Atoriti Dokta Jospeh Apa i bin kamap na sainim tu dispela MoA.

Em i tok amamas long kisim Monpi Coffee  kampani olsem wanpela patna long wok wantaim.

Monpi Coffee Exports i bringim namba bilong ol patna i wok wantaim EHPHA i go antap long 34.

 “Mipela i gat bikpela amamas tru long lukim Monpi Coffee Exports kampani i sapotim mipela long wok bilong imunaisesen long provins,” Dokta Apa i tok.

“Em i gutpela long yumi wok insait long dispela Pablik Praivet Patnasip (PPP) program we i save wok gut na mipela i ken wok wantaim long bringim gutpela sevis i go long ol pipel.

“Mipela i amamas tu long ol helt woka husat i bin kamap na stap long imunaisesen trening woksop. “Dispela ol helt woka i kisim pinis gutpela trening we ol bai i go bek long distrik bilong ol na mekim gutpela wok.”

Em i tok atoriti i amamas tu long ol arapela lain husat i laik helpim long ranim imunaisesen program long provins.

Sape Metta i raitim