PLANTI memba bilong pablik long Madang i askim long watpo Madang Provinsal Helt Atoriti (PHA) i baim 7-pela nupela kar, taim Madang provins i bungim hevi bilong kisim gutpela helt sevis.

Dispela ol 7-pela nupela kar i stap fran long Modilon Jeneral Haus sik na we prais bilong ol i stap antap moa.

Ol i tok planti ol masin long haus sik long lukim ol sik manmeri i bagarap na olpela pinis tasol Madang PHA i lukim em i orait na i go het long baim ol kar.

Ol i tok haus sik laikim tu ol ventileta masin, X-rei na ol arapela masin bilong wok.

Ol sik manmeri i save lusim Madang Jeneral haus sik na go long ol arapela liklik haus sik olsem Yagaum Luteran haus sik.

Ol midia lain i laik kisim stori long siaman bilong Madang PHA bod, Dokta Charles Kalana na Madang PHA Sif Ekseketiv Opisa (CEO), Paul Mabong, tasol ol i tok ol bai bekim ol askim long pepa long bihain taim.

Wantok Niuspepa i no kisim bekim bipo long em i go long prin.

James G. Kila i raitim