SIK coronavirus (COVID-19) i stap pinis long kantri olsem na wok bilong banisim na pait agensim dispela sik i mas go het yet.

Na sapot i kam yet long ol grup, ogenaisesen, bisnis haus, ol patna, stekholda na wan wan ol manmeri long skruim wok.

PNG Saina Komyuniti em i wanpela grup we i wok long givim planti sapot na helpim i go long ol helt woka na polis long Isten Hailans.

Long Fonde wik i go pinis, dispela grup i bin givim 6-pela bokis bilong pesinel proteksen ikwuipmen (PPE) i go long menesmen bilong Isten Hailans Provinsal Helt Atoriti (EHPHA).

Menesa bilong SENG DA trading Didi Yu i bin makim PNG Saina Komyuniti na givim ol PPE i go long EHPHA.

Em i tok long dispela taim bilong COVID-19, Saina komyuniti i amamas long givim helpim long pait agensim dispela sik.

“Olsem mausman bilong PNG Saina Komyuniti long IstenHailans, mi laik tok olsem mipela i amamas long kamap na patisipet olsem patna long wok wantaim helt sekta long provins na long kautri long wok bilong daunim kamap bilong COVID-19,” Yu i tok.

Em i amamas tu long Saina Komyuniti na SENG DA Trading i wok bung na givim helpim.