Wanpela nes meri long Tabubil Haus sik long Westen Provins i go long bikpela mak bilong em taim em i sevim laip bilong wanpela liklik mangi long wanpela ples i stap insait long bikbus long Westen Provins.

Em i bin mekim dispela pasin insait long wanpela medivak operesen o taim bilong karim ol bikpela sik manmeri na pikinini insait long bikbus i go long haus sik long helikopta we i bin kamap i no long taim i go pinis.

Nem bilong dispela nes meri em Angela Gul, em i wanpela intensiv kea nes long Tabubil haus sik. Em i bin bihainim Medevac tim na i go long ples Seltamin. Dispela ples i stap 30 minis longwe long Tabubil taim yu kalap long helikopta na i go long dispela ples. Ol i bin go na seivim dispela liklik mangi nem bilong en Moses Stanley nae m i gat 10-pela krismas.

Moses i bin kisim bikpela sik tru. Em i bin pekpek wara na skin hat long wanpela mun bipo long medevac tim i go seivim em. Taim ol medevak tim i go kamap, Moses i bin i go waitskin olgeta na i nogat wara long bodi bilong en. Em i bin slip tasol long han bilong mama bilong em i stap. Moses i gat sik long blut bilong en tu olsem na dispela i mekim sik bilong en i go bikpela moa.

Nes meri Angela i givim sampela marasin wara long Moses taim ol i stap insait long helikopta na flai i go long Tabubil. Dispela i strongim Moses.

“Em i namba wan taim bilong mi long stap insait long medevak operesen na mi pilim olsem mi mekim bikpela samting stret insait long woklaip bilong mi taim mi helpim liklik mangi Moses,” Angela Gul i tok.

Long dispela taim, ol i bin helpim wanpela TB sikman na karim em i go long haus sik.

Angela i tok, long 15 krismas em i bin wok olsem nes, em i no bin pilim amamas long wok bilong en inap em i seivim laip bilong Moses long dispela medevak operesen.

“Dispela wok mi bin mekim em mi mi ting olsem em pasin bilong i go aut na givim ol sevis long ol pipel husat i nidim stret. Na mi tok tenkyu long employa bilong mi, Tabubil Haus sik na OK Tedi Mining Limited (OTML) long givim dispela sans long mi long stap insait long medevak tim,” Angela i tok.

Sosca Stanley, mama bilong Moses i tok tenkyu long OTML na Tabubil Haus sik long seivim piknini man bilong en husat i wok long pilim orait i stap.