Papua Niugini i konfemim namba 11 COVID-19 keis long June 25^th,2020.

Nesenel Kontrol Senta (NCC) i luksave long dispela keis bihain long ol i mekim bikpela kontek tresing. Keis namba 11 em i wanpela meri i gat 26 krismas na em pren bilong keis namba 10.

Risal bilong en i kam long Sentral Pablik Helt Laboratori (CPHL) long Pot Mosbi long sikis kilok avinun long laswik Fonde.

Ol sampela wokmanmeri husat i bin kisim skul long lukautim ol COVID-19 sik manmeri i lukautim keis namba 11 long Rita Flynn Kot long Pot Mosbi na em i wok long kamap orait gen.

Ol COVID-19 rispons tim i wok long mekim wokpainimaut long as bilong ol tripela nupela COVID-19 keis i kamap. Tasol ol i no painim yet.

Deputi Kontrola Dokta Paison Dakulala i tok, “Ol manmeri bai i no inap long save olsem ol i gat COVID-19 na ol i bai muv raun wantaim sik. Olsem na em i moa gutpela long stap long haus taim yu pilim olsem yu gat kus, skin pen na skin hat. Hot lain namba 1800200 i stap yet long helpim yu sapos yu laik kisim test.”

Kontrola David Manning i tok strong long ol pablik long tambu tru long toktok long ol COVID-19 keis we i no kam long opis bilong Nesenel Kontrol Senta. Em i tok saibakraim yunit bilong en i toksave long em pinis long ol giaman toktok we i wok long raun long sosel midia.

Rebecca Negere i raitim