BIKPELA tingting bilong Waipu komyuniti em olsem gavman i mas givim moa taim long ol elementri skul insait long kantri bikos em namba wan stat bilong edukesen laip,” Komyuniti lida bilong Waipu Mathew Kapiar i bin tokim Wantok Niuspepa.

“Maski Yunivesiti, kolis, sekenderi na praimeri skul insait long kantri i stap tasol olgeta sumatin i statim edukesen laip bilong ol long elementri skul olsem na mipela i askim sapot gavman i ken luksave long rimot elementri skul kain olsem Waipu na divelopim ol pikinini,” Mathew i tok.

“Olgeta ples i mas gat wan wan elementri skul bilong ol we bai ken helpim pikinini bilong ol insait long komyuniti,” em i tok.

“Mipela Waipu komyuniti nidim divelopmen long elementri skul bikos dispela em namba wan edukesen rot bilong ol pikinini i ken go long praimeri, sekenderi na yunivesiti o kolis,” em i tok.

Em i tok bikpela salens nau em long wokim nupela elementri klasrum we ol pikinini i ken sindaun insait gut na lainim gut samting.

“Mipela papamama tu i mas sapotim ol pikinini bilong mipela long kisim kwaliti edukesen bikos mipela yet mekim na gavman bai amamas long helpim,” em i tok.

Em i tok edukesen na helt em bikpela hevi long komyuniti tasol ol i wok strong long bringim liklik divelopmen i go insait long komyuniti.

Jacklyn Kimala i raitim