Gavman i laik bai planti moa kaikai prodak i mas kamap insait long kantri bai em i no ken spendim moa mani long baim ol samting i kam long ovasis.

Carolyne Ketsimur i raitim

GAVMAN bai wokbung wantaim ol praivet sekta long senisim olgeta impot kaikai ( kaikai PNG save baim long narapela kantri).

Dispela em long na mekim daunstrim proses bilong ol ro material i go long fainel prodak insait long kantri.

Dispela bai kamap aninit long agrikalsa, forestri na fiseris sekta.

Ol samting olsem, grin bin kopi, kakao bin, kokonas wel, pis na moa ro material bai mas proses long PNG yet.

Minista bilong Intanesenel Treid na Invesmen, Richard Maru i bin mekim dispela toksave las wik.

Em i tok em i amamas tru long tokaut long kantri na ol pipel olsem Gavman i sanap strong long mekim dispela senis.

PNG i gat bikpela namba bilong lo na oda hevi, ol lain i no gat wok, na namba bilong ol lain i dai.

Dispela i kamap long wanem gavman i no menesim gut kantri na kamapim ol gutpela polisi bilong lukautim ol pipel.

Nau em i wok bilong gavman long senisim dispela na kamapim ol nupela rot bilong ranim kantri.

Gavman i mas strongim na groim ikonomi, mekim moa mani na kamapim planti moa wok long stretim ol dispela hevi.

Senisim ol impot kaikai na kamapim daunstrim proses em wanpela rot gavman i laik mekim long stretim kantri.

Wantaim dispela, kantri bai kisim moa veliu long ol ro material bilong en, na kamapim moa wok bilong ol pipel.

Long dispela taim, PNG impotim yet rais long mani mak long K800 milien i go K900 milien long wanpela yia, K300 milien long ol dairi prodak.

Na i salim grin bin kopi na kakao we kantri ken prosesim em yet.

Nau em i taim dispela pasin i senis.

PINIS.