IRC i opim nupela takis opis bilong NCD na Sentral provins long Fonde 10, Novemba 2022 we bai sevim ol liklik, namel sais na bikpela SME takis peia bilong NCD na Sentral provins.

Carolyne Ketsimur i raitim

INTERNAL Revenue Commission (IRC) i bin opim nupela takis opis bilong NCD na Sentral provins long Fonde 10, Novemba 2022.

Em i longpela taim tru IRC i bin wok long painim opis spes inap Gavana Powes Parkop i givim opis spes we IRC bai ranim ol takis wok bilong NCD na Sentral provins long en.

Dispela nupela opis i stap long National Capital District Commission (NCDC) Haus long Waigani.

Opis bai sevim ol liklik, namel sais na bikpela SME takis peia bilong NCD na Sentral provins.

Ol bisnis husat i save operet long NCD na Sentral provins i ken go long hap na baim takis bilong ol.

Mani bilong takis bai apim level bilong divelopmen long NCD na Sentral provins sapos moa SME i stat long baim takis.

Long taim bilong opim nupela IRC opis, Gavana Parkop i tok, sapos i nogat takis, gavman i no inap operet, na bai no gat sevis.

Em i amamas long wok bung wantaim IRC long kisim takis long ol pipel bilong em.

Em i tok IRC i mekim gutpela wok long kisim takis long ol SME bilong NCD na Sentral provins.

Mista Parkop i tok em i sapotim ol bisnis long wok long NCD, long wanem ol dispela bisnis bai baim takis, na bai gat moa divelopmen long kapitel siti.

Wantaim dispela pasin, olgeta pati bai kisim gutpela samting.

Sapos i nogat bisnis, bai no gat takis, na nogat divelopmen long helt, edukesen, infrastraksa na moa.

Long wankain taim, IRC i bin lonsim tu nupela infomesen kit buk bilong takis we olgeta infomesen bilong takis i stap long en.

Wantaim dispela buk, ol takis peia i ken ritim na save gut long rot bilong bihainim na baim takis, na ol arapela infomesen bilong takis.

PINIS.