Komisina bilong IRC, Sam Koim i tok ol olgeta bisnis i mas baim takis bilong wanem gavman i nidim dispela mani long mekim ol wok insait long kantri.

Carolyne Ketsimur i raitim

KOMISINA bilong IRC, Sam Koim i bin mekim strongpela tok olsem IRC bai wok strong long painimaut wanem ol bisnis i no wok long baim takis na mekim ol i mas baim.

“Moa bisnis i baim takis, bai gat moa sevis,” em i tok.

Em i tok sapos dispela wok i go gut na IRC i kisim moa takis, em i laik lukim olsem gavman i karimaut gut sevis long ol sitisen bilong PNG.

Takis em mani we gavman i save kisim long ol sitisen na yusim long ranim kantri, provins, ol taun kaunsil na lokal level gavman.

Aninit long gavman, IRC i save kisim takis bilong baim ol sevis olsem helt, edukesen, difens na ol infrastraksa.

Dispela takis mani kam long potnait pe bilong ol wok manmeri na ol bisnis we i operet long kantri.

Kantri i nidim takis bilong divelopmen.

IRC i sanap strong long stretim 4-pela samting.

Em long kisim rait namba o mak bilong takis, long rait taim, long liklik kos na long mekim isi long ol lain i baim takis.

Mista Koim i tok IRC i wok long kamapim ol isi rot bilong helpim ol takis peia i ken bihainim ol lo bilong baim takis.

Long rejista long baim takis, yu mas rejista long kisim ‘ Tax Identification Number’ (TIN), bringim takis riten bilong yu (hamas mani yu mekim long wanpela yia na hamas takis yu baim).

Yu mas baim takis long taim bilong baim, long olgeta yia.

Go long IRC opis long rejista long kisim TIN na baim takis bilong yu.

PINIS.