Wok i kamap long save moa long ol lo bilong ol liklik wok maining long PNG.

Joseph Dawai i raitim

DIPATMEN bilong maining polisi na gioeset menemen i wok long mekim wok painim aut long strongim smol skel maining Ekt bilong kantri.

Mista Charlie Kendua, man husat i go pas long mekim wok painim aut long stretim smol skel maining sekta i tok em we i wok long gro, tasol i no gat wanpela polisi bilong sefti proteksen na helt.

Em i tok namba bilong ol man husat i wokim aluviel main insait long graun na wara, i wok long go antap tasol i no gat gutpela rekod bilong en, olsem na dispela i save givim bikpela hat wok.

“Olsem na mipela i laik putim lo i ken helpim ol we pipel long wok insait long smol slek maining sekta na tu long putim helt na seifti toksave aut we mipela i bin kamapim insait long maining sekta Ekt.

“I gat sampela sapot bilong mani em i stap long dispela kain wok tasol nau yet gavman i mas helpim mipela long mekim dispela wok,” Mista Kendua i tok.

Mista Kendua i tok seksen 48 i go long 64 bilong maining Ekt i tok olsem; sapos yu laik wokim aluviel gol maining yu mas aplai go long MRA.

“Ol maining opisa i mas lukluk i go long ol pepa bilong yu na sapos ol pepa bilong yu em i orait bai ol i givim yu laisens long wok inap 5-pela yia.

“Bihain bai yu go aplai gen na dispela pastaim kaunsil bai lukluk gen long ol pepa bilong yu long kisim nupela laisens long wok gen.

“Seksen 38 bilong sab seksen 2 bilong maining Ekt, i tok ol papagraun i mas kisim 51 pesen na investa i mas kisim 49 pesen.

Tasol planti taim ol investa i save kam giamanim ol papagraun na tokim ol olsem em i kisim mani kam olsem na papagraun bai kisim 25 pesen na ol bai kisim 75 pesen.

“Tasol dispela investa i no save bihainim rot o polisi bilong wok, olsem na gavman i save painim hat long helpim ol smol slek main,” em i tok.

Em i tok insait long maining Ekt 1977, ol i lukim olsem i gat lo bilong proteksen sefti Ekt i stap long helpim helt bilong ol man tu.

“Olsem na mipela i laik strongim lo bilong sefti na helt bilong envairomen, na bai yu mas aplai long envairomen Ekt, na bai ol inap givim yupela level 2 laisens.

“Narapela lo tu em i stap sapos yu laik ekspotim gol bai yu inap long i go long Sentral Benk long ekspotim gol bilong yu tu, na yu ken kisim ekspotim laisens long ekspotim gol bilong yu long wanpela yia tasol, na em i no gat fi long yu baim,” Mista Kendua i tok.

PINIS.