SIAMA N bilong Ok Tedi Mining Limited (OTML) Dokta Roger Higgins i tokaut olsem kampani i mekim dividen mani mak long K300 milien we em i baim i go long ol seaholda las wik.

Dispela nau i bringim total dividen mani OTML i baim i go long K450 milien long 2021. Dokta Higgins i tok maski long hevi bilong paia i bin kamap long main prosesing fesiliti las yia, tupela wik operesen i pas long Mas 2021, hevi bilong COVID-19 we i bin mekim na ol wok lain i sot, kampani i bin inap long kamap wantaim strongpela fainel kwata prodaksen na gutpela metal prais. Bod i tokaut long dividen bilong Kumul Minerals (Ok Tedi) Limited we i papa long 67 pesen bilong Ok Tedi bihain long ol i trensferim ol sea i kam long Independen Stet ov Papua Niugini, na tripela papagraun entiti we i makim ol komyuniti husat i gat 33 pesen sea long kampani. Em i tok moa olsem OTML i go het yet long mentenim strongpela balens sit we i no gat dinau na likwiditi i orait. Dokta Higgins i tok tenkyu long menesmen na wokfos long hatwok bilong ol na sapot i kam long ol lokal komyuniti long dispela bikpela krismas presen bilong ol pipel bilong PNG insait long dispela yia we i bin gat planti salens.Em i tok wantaim apoinmen bilong tripela nupela dairekta bilong OTML Bod, kampani i lukluk long mekim namba wan prodaksen long dispela yia. Dokta Higgins i tok tu olsem Bod i tok orait long mekim K750 milien invesmen long tupela yia i kam. Dispela em bilong stretim na apgretim prosesing fesiliti long mekim gut operesen long laip bilong main i go inap long 2032 na i go yet. Long wankaim taim, OTML Spesel Maining Lis (SML) bai ekspaia long Me 2022 na aplikesen bilong nupela SML i go pinis long Mineral Risos Atoriti long Desemba 2021.