Taim olgeta oganaisesen i bin malolo long las mun bilong 2021, Nasfund i bin mekim wok bilong en long promotim sevings bilong pinis wok long ol komyuniti.

Carolyne Ketsimur i raitim

Wanpela tim bilong Nasfund long Lae brens i bin go long Finschafen long mekim awenes bilong na rejista ol memba long hap.

Wamora Farmer’s Association i bin askim Nasfund long go mekim dispela awenes na rejistresen.

Dispela grup em ol kakau, kopi na vanila fama long Wareo rijon bilong Kotte LLG long Finschafen. Bihain long dispela namba wan raun, Spesel Projek Menesa bilong Nasfund, Judah Waffi i kisim namba tu grup i go.

Namel long dispela grup i gat ol lain i makim Digicel CellMoni na BSP. “As bilong dispela visit em bilong givim ol membasip kat long 310 memba bilong Wamora Farmer’s Association husat ol i bin rejista wantaim Eda Supa, sevings bilong infomal sekta,” Mista Waffi i tok.

Em i tok em i kisim CellMoni na BSP i go wantaim tim bilong em bai ol i ken lukim na sapotim ol rurel pipel long benking na sevings.

Nasfund i bin sainim Memorandum Of Understanding (MoU) wantaim Digicel CellMoni long yusim CellMoni sevis long helpim ol rurel komyuniti long dipositim ol sevings bilong ol.

Long visit bilong ol, ol komyuniti i bin welkamim ol gut tru. Ol pipel i bin kisim skul bilong sevim mani bilong taim ol i pinis long wok.

Ol memba nau i ken yusim membasip kat bilong ol long ol narapela sevis. Dispela visit nau i pinisim olgeta wokabaut bilong Nasfund insait long Morobe Provins long yia 2021.