OL wok lain bilong Bank South Pacific (BSP) i mekim donesen i go long Pot Mosbi Jeneral haus sik long Trinde 22 Desemba 2021. Donesen i bin go long mateniti wing long ol mama, ol nupela bebi na ol hatwok nes. Dispela donesen i bin kam stret long lewa bilong ol wan wan BSP wok manmeri husat i gat bikpela laik bilong givim liklik samting i go long haus sik. Seketeri bilong BSP Mary Johns i bin stap namel long dispela tim husat i bin mekim dispela visit. Em i tok tenkyu long tim bilong BSP Operesen na IT Stretajik Bisnis Unit long serim blesing bilong ol wantaim ol mama na ol nupela bebi long dispela krismas. “Em i naispela pasin long givim i go bek long komyuniti. Na em i moa gutpela olsem tim i luksave long ol mama wantaim ol nupela bebi. Ol dispela liklik presen i bin kam yet long han bilong ol BSP wok lain.” Mis Johns i tok. Dairekta bilong Medikol Sevis long Pot Mosbi Jeneral Haus Sik, Dokta Kone Sobiin i tok dispela yia i bin hatpela yia bilong haus sik bikos long ol salens COVID-19 i bin kamapim. Tasol em i amamas long tim bilong em long Pot Mosbi Jeneral haus haus sik i mekim bikpela hatwok i kam inap nau. Dokta Sobiin i bin kisim ol presen makim ol mama na ol bebi na em i tok dispela donesen i kam long rait taim. Em i tok krismas i taim bilong givim na selebret. Em i tok tu olsem em yet wantaim na ol wok lain bilong haus sik na ol mama i tok tenkyu long BSP long sapot bilong em.

Carolyne Ketsimur i raitim