SEKETERI bilong Edukesen, Dokta Uke Kombra i tok Nesenel Dipatmen ov Edukesen i rejista pinis Sir Max David Egrikalsa Teknikel Koles.

Wok bai stat nau long kirapim dispela nupela gavman institusen long graun bilong Katolik Misin long Brahman, Usino-Bundi long Madang Provins. Dokta Kombra i tokaut tu long nupela rejistresen namba bilong Sir Max David Egro Teknikel Koles. Em i mekim dispela tok long ol pipel bilong Usino-Bundi taim em i go wantaim Minista bilong Edukesen, Jimmy Uguro i no long taim i go pinis. Dokta Kombra i tokaut tu olsem dispela nupela teknikel koles bai stap aninit long Nesenel Edukesen Dipatmen na i no Madang provinsal Edukesen Bod. Katolik Sios i soim gutpela pasin na i givim graun long wokim nupela koles na em i askim Madang provinsal gavman na tu distrik na ol arapela stekholda long PNG long helpim long sapotim dispela nupela teknikel koles. Dokta Kombra i tok Nesenel Gavman aninit long Nesenel Dipatmen ov Edukesen i givim pinis K1 milien long kirapim dispela teknikel koles. Namba wan hap bilong wok bai kamap long mentenens bilong ol woksop long Brahman we ol teknikel skils trening bai kamap. Dokta Kombra i tokaut olsem koles bai stat wantaim tupela namba wan tred kos na bihain i bringim ol arapela kos long ol sumatin. Em i bin tokim ol komyuniti long Brahman long lukautim ol woklain na ol propeti taim koles i kamap. Dispela koles i kisim nem bilong lei misineri Max Davis long Brahman husat i wok wantaim St Michael’s Brahman Sekenderi Skul long taim skul i stat olsem haiskul long 1980 samting.

James G. Kila i raitim