Joseph Dawai i raitim EGRIKALSA em i wok tru bilong yumi long taim bilong ol tumbuna i kam inap nau na dispela wok inap sevim ikonomi bilong PNG sapos yumi go bek long yusim graun bilong yumi.

Kaunsil bilong Widamawod long Gogodala/Aramia LLG bilong Midel-Flai Distrik,Westen provins Henry Butumi i mekim dispela toktok na em i askim watpo na gavman na praivet sekta i no save helpim ol lokal fama. Butumi i tok 26 wod long Gogodala eria i gat raba plantesin na Widamawod i gat raba pemit laisens tasol ol lain long distrik opis i no save helpim mipela. “Gogodala/Aramia em i pulap long ol risos tasol no gat ol teknikel man long helpim mipela ol mausman olsem kaunsil na ol sampela saveman long helpim mipela,” em i tok. Raba i ken helpim ikonomi bilong kantri sapos wol raba prais i go antap sapos PNG i soim wol olsem i gat dispela kain mak bilong raba i stap long kantri. Em i tok eria i gat planti risos na raba i wanpela hatwok ol pipel i bin mekim na ol diwai raba i save pinisim gris bilong graun na ol dispela diwai i go bikpela na i no gat wok bilong ol. “Wanem wok ol lida i kisim i kam long helpim ol pipel mas karim kaikai na ol pipel i mas kisim gutpela samting long hatwok ol i mekim. Tasol planti taim ol dispela pipel husat i kisim dispela kain projek i kam long ol rural eria i save giamanim gavman o ol praivet sekta long kisim mani long helpim intres bilong ol yet,” em i tok. Kaunsil Butumi i tok sastenabel plen bilong olgeta projek i mas kamap olsem trening bilong ol lokal pipel long menesmen bilong projek na wei bilong salim ol raba i go long wanem hap long kisim mani bilong helpim ol family em impoten tru. Butumi i tok strong long olgeta lida bilong provins long kam na wok bung wantaim ol wod kaunsila long helpim ol rural komyuniti husat i gat risos tasol ol i painim hevi long helpim ol yet.