DIGICEL Group Holdings Limited (DGHL) i tokaut olsem em i mekim agrimen long salim Digicel Pacific Limited (DPL) i go long Telstra Corporation Limited, wanpela bikpela telekomyunikesen kampani long Australia.

Minista bilong ICT, Timothy Masiu i tokaut olsem em i kisim wanpela ko-sain pas i kam long Sif Ekseketiv Opisa na Menesing Dairekta Andrew Peni wantaim Telstra Intenesenel Sif Ekseketiv Opisa, Oliver Camplin-Warner. Em i tok disepela pas i givim fomal edvais long dispela agrimen olsem em i kamap tru. Mani mak we Telstra i baim DPL em i nap long 1.85 US Dola. DPL i operet long 6-pela maket long Saut Pasifik. Em long Papua Niugini, Fiji, Samoa, Vanuatu, Tonga na Nauru.

Digicel nau bai no inap operet moa long Pasifik bihain long dispela. Tasol Menesmen tim bilong Digicel nau i wok bai stap na karim aut wok long ol kastoma bilong DPL long Saut Pasifik. Dennis O’Brien husat em Digicel Faunda na Siaman bilong Digicel bai joinim Bod ov Dairekta bilong Telstra. “Long 2006, mipela i statim bisnis long Saut Pasifik rijon we i bin divelopim pasin bilong yusim mobail fon long toktok long ol famili na ol pren. Long wankain taim em i senisim ol lokal ikonomi bilong 6-pela pasifik kantri.” Mista O’Brien i tok. Em i tok moa olsem em i amamas olsem Telstra bai surukim moa yet dispela sevis i go long narapela level.