CENTRE for Excellence in Financial Inclusion (CEFI) na Market for Village Farmers (MVF) i bin sainim Memorandum of Understanding (MoU) wantaim 7-pela Partner in Financial Institutions (PFI) o ol fainensel insitusen long kantri las wik.

Dispela MoU em bilong ol dispela PFI long wokbung wantaim MVF long ol projek long 6-pela provins long PNG. Ol dispela provins em Westen Hailans, Jiwaka, Simbu, Isten Hailans, Morobe na Is Nu Briten. Egrikalsa em gutpela bisnis olsem na CEFI bai mekim wok bilong 7-pela PFI na givim teknikel sapot long ol wantaim sapot i kam long wanpela konsalten long disainim na divelopim ol fainensel prodak na sevis we bai inapim nid bilong MVF taget long ol rurel komyuniti. CEFI na ol  wan wan PFI bai divelopim bisnis divelopmen plen wantaim plen bilong trening inap long tripela yia long sapotim ol haus lain we MVF i tagetim ol long kamap veliu sein pleia. Ol PFI we i bin sainim MoU em, BSP, Mi Bank, Women’s Micro Bank, People’s Micro Bank, Kada Poroman Micro Finance, Nasfund Contributors Savings and Loan Society na East New Britain Savings and Loan Society. Dispela MoU saining em i wanpela impoten iven tru long PNG bikos em bai opim ol rot bilong egrikalsa long PNG na

kontribut long ikonomi bilong kantri. Ekseketiv Dairekta bilong CEFI, Saliya Ranasinghe i tok em bikpela samting tru long agrikalsa sekta bilong ol fainensal institusen i komitim ol yet long sapotim dispela projek. “CEFI i redi long wokbung wantaim MVF na ol fainensal institusen long promotim ol fainensal inklusen sevis long ol komyuniti i save mekim faming long dispela 6-pela provis,” George Awap husat i makim Bank bilong PNG i tok. Dispela projek bilong MVF i nap long mani mak long $USD38 milien na gavman ba karimaut aninit long Dipatmen bilong Agrikalsa na Laipstok. Fanding bilong dispela projek i kam yet long International Fund for Agriculture Development (IFAD).

Carolyne Ketsimur i raitim