NATIONAL Executive Council (NEC) i bin rausim Isikali Taureka olsem Menesing Dairekta bilong Kumul Consolidated Holdings (KCH) i no longtaim i go pinis.

Bihain long dispela muv, Profesa David Kavanamur i stap olsem interim MD inap ol i kisim wanpela long dispela posisen. Long wankain taim Moses Maladina i stap olsem Siaman bilong PNG Power Ltd. Taureka i lusim dispela posisen bihain long 20 mun. Praim Minista James Marape i tok dispela i kamap bikos wok bilong KCH na ol projek bilong State Owned Enterprises (SOEs) i no wok long kamap gut na i abrusim taim bilong ol long pinis. Praim Minista Marape i tok Gavman i bin endosim ol rifom bilong SOEs long Oktoba 2019 bikos em i lukim olsem em ol impoten program we Gavman i mas karimaut. Em i tok gavanens na akauntabiliti i mas go wantaim ol projek bikos ol dispela projek ba senisim na benefitim welfe bilong ol pipel. Na taim ol projek i kisim longpela taim long pinis na nogat gutpela ansa bilong wanem dispela i kamap, gavman bai askim husat i risponsibol long risain o NEC yet bai askim yu long pinis wok.