OK Tedi Mining Ltd (OTML) i givim 500 oksijen silinda, ol PPE na ol medikol saplai i go long Goroka Haus Sik. Dispela helpim i kamap bihain long ol wok manmeri bilong Isten Hailans husat i save wok long OTML i bin askim kampani long helpim haus sik.

Goroka Haus Sik i sot long ol medikal saplai bikos namba bilong COVID-19 keis na dai i go antap tru. OTML i bin go mekim donesin long Goroka. Long dispela donesin, kampani i givim ol oksijen konsentreta, ol mask, sil bilong karamapim pes, ol glav na ol narapela medikol saplai. Jeneral Menesa bilong OTML Komyuniti na Operesin Sapot, Kedi IIimbit i tok OTML i amamas long helpim haus sik wantaim ol dispela medikol saplai. “COVID-19 i kamapim planti hevi long helt sistem bilong kantri na planti famili i kisim bikpela bagarap. Mipela i helpim Goroka Haus Sik long sevim laip bilong ol pipel long ol taim i kam,” Mista IIimbit i tok. Long mun Mas, OTML i bin givim K20 milien long helpim PNG long paitim COVID-19. Long dispela mani, K5 milien i bin go long Pot Mosbi haus sik. Sif Ekseketiv Opisa bilong Goroka haus sik i tok tenkyu long OTML long bikpela helpim bilong ol. Em i tok haus sik i traim hat long sevim laip bilong pipel husat i kisim sik COVID-19. Em i tok haus sik i sot long inapim olgeta sikmanmeri husat i silip stap long haus sik. Em i tok OTML i mekim dispela donesin long rait taim na ol Goroka haus sik wantaim ol pipel long Isten Hailans i amamas na tok tenkyu long dispela.