NU Ailan Provinsal Gavman i sainim Kabon Treid Agrimen wantaim New Ireland Hardwook Timbers (NIHT) Inc long Kavieng long 20 Oktoba.

Dispela long lukim NIHT i bihain lo na i bihain gutpela rot long mekim wok bisnis. Nu Ailan Gavana, Sir Julius Chan i mekim dispela tok long taim gavman bilong em i sainim dispela agrimen long las wik. Sir Julius i tok dispela long lukim tu kampani i bihainim lo na wok bung wantaim ol inkoporetet (rejista) papagraun grup, Nu Ailan Provinsal Gavman na Klaimet Senis na Divelopmen Atoriti (CCDA) olsem wanem gutpela samting ol stekholda long agrimen i mas kisim em ol i mas kisim gut. Sif Ekseketiv bilong NIHT Stephen Strauss i strongim tingting bilong ol lain husat i bin stap long dispela bung bilong sainim agrimen olsem kampani bai bihainim olgeta tok i stap long agrimen. “NIHT i hop long i gat kabon treid long wan wan yia na long salim ol kredit long gutpela prais long ol stekholda na ol patna,” em i tok. Strauss i tok klia olsem senis long prais inap kamap sapos prais bilong kabon treid long wol maket i go daun. “Salim bilong kabon treid na long wanem taim mipela i salim i stap long han bilong prais long wol maket. “Sapos prais i gutpela, mipela bai baim long prais antap, tasol prais i no gutpela, mipela bai baim long prais daunbilo. “Planti ol toktok i kamap pinis na i wok long kamap yet long hevi bilong Klaimet Senis,” Strauss i tok. “Dispela ol toktok i kamap pinis long Yunaitet Nesenel (UN) Jeneral Asembli kibung long Niu Yok (Amerika) i no longtaim i go pinis. “Dispela ol wankain toktok bai kamap gen long UN Klaimet Senis kibung long Glasgow, Scotland long neks wik i go.”