LONG nambu European Union- PNG Bisnis, Tred na Invesmen Konprens we i bin kamap long Lamana hotel long Pot Mosbi, planti gutpela toktok bilong mekim bisnis i bin kamap long ol spika husat i bin stap long penel.

Saliya J. Ranasinghe bilong CEFI i bin tokaut klia olsem i gat 4-pela fainensal institiusen na ol fainens kampani i stap long kantri we ol bisnis lain i ken eksesim bilong divelopim tred na praivet sekta long kantri. Ol dispela fainensal insititiusen na fainensal kampani i save givim dinau na tu yu ken mekim diposit long ranim bisnis. Long wankain taim, Mista Ranasinghe i tok tu olsem Maikro bank tu em narapela fainensal institiusen we i save givim ol maikro fainens. Tude i gat 4-pela Maikro bank we ol pipel i ken eksesim long kisim sevis long ol. Na planti kastoma i wok long mekim akaun wantaim ol dispela maikro bank.

Mista Ranasinghe i tok tude i gat 500,000 akaun nau wantaim micro bank long PNG. Ol dispela fainensal institiusen na fainens kampani i save givim gutpela fainensal sevis long ol pipel. Na dispela em gutpela sans bilong ol bisnis lain long yusim gut ol dispela sans long divelopim tred na praivet sekta long kantri. Mista Ranasinghe i tok PNG i laki tru long gat ol dispela sans long apim maket wantaim ol narapela kantri.

Carolyne Ketsimur i raitim