PAPUA Niugini  bai gat ikonomik databes nau bihain long Tresera Ian Ling Stuckey na Hai  Komisina bilong Australia John Philp i bin lonsim Ikonomik Databes las wik long University of Papua New Guinea (UPNG).

Dispela databes bai gat ol infomesin stat long taim kantri i bin kisim Independens. Dispela em impoten risos bilong praivet sekta, ol risetsa na ol lain i save mekim polisi. Databes i gat data bilong 160 ikonomik indeketa bilong yia 1975 i kam inap long 2021. Dispela em onlain pletfom we UPNG wantaim Australia Nesenel University i kamapim wantaim sapot i kam long PNG na Aaustralia patnasip. Hai Komisina Philp i tok PNG na Australia i wok long wok bung wantaim lomg strongim na divelopim ikonomi bilong kantri bai go wantaim ol nids na ol sans bilong en.

“Koneksin namel long UPNG na ANU soim gutpela piksa  bilong moden rilesensip. Ol pipel bilong tupela nesen i wok bung wantaim bilong kamapim gutpela sindaun.” Mista Philp i tok. Em i tok moa olsem Australia i komitim em yet long sapotim ikonomi bilong PNG na divelopim ol ki eria bilong kantri. “Long mekim disisen bilong ikonomi i no isi samting. Long gat planti data bilong helpim gavman long mekim disisen em i impoten samting tru. Em bai strongim ol evidens bilong ol disisen we pablik tu i ken gat ekses long en.” Em i tok. Ikonomik Leksera bilong UPNG, Maholopa Laveil i tok bipo em i hat tru long painim data bilong ikonomik. “Wantaim dispela databes, olgeta samting bai isi na pablik i ken gat ekses long ol data we bai apdet olgeta yia. Dispela em bai daunim wok bilong ol risetsa.” Mista Laveli i tok.