LONG Bogenvil BSP em wanpela benk tasol i operet long tripela rurel senta. Em long Wakunai, Arawa na Buin.

BSP i komitet tru long givim ol benking sevis bilong em long ol dispela eria bilong namba bilong ol kastoma i wok long gro i go antap. Bikos long dispela BSP i laik apim sevis long  Arawa brens long inapim laik bilong ol pipel long Bogenvil. Sif Ekseketiv Menesa bilong BSP, Robin Fleming wantaim Eria Menesa bilong BSP Niugini Ailan, Ruby Patu i bin visitim Arawa na paitim toktok go kam wantaim Arawa Taun Meya, Memba bilong Saut Bogenvil, Timothy Masiu na Business Arm Of South Bougainville (BUSIBA) long apim sevis bilong BSP long Arawa brens na Buin Sab-brens. Mista Fleming i tok dispela wokabaut bilong em na tim i go long Bogenvil i kamap long rait taim bikos em i klostu long kristmas na em taim we BSP i save kisim planti kastoma. Em i tok em i amamas tru long visitim ol Bogenvil brens na givim luksave bilong em long ol wok manmeri husat i save wok hat tru na kontribiut i go long givim sevis long ol kastoma long rijon. BSP i no save givim ol benking sevis tasol long rijon, nogat.

Em i save mekim ol komyuniti projek tu aninit long Kopret Sosol Risponsibiliti projek inisetiv bilong em. Menesa bilong Buka brens, Julie Warren na tim bilong em i bai givim namba 13 komyuniti projek bilong en long dispela mun. Buka brens bai givim ol desk i go long Lonahan Praimeri Skul long Is Kos Buka. Long Jun, Arawa i bin givim ol nupela desk i go long Arawa Praimeri Skul. Ol dispela desk i bin go long ol gred 3 na 4 sumatin. Na tu ol i mekim mentenens long klasrum. Stat long 2009, BSP i karimaut 21 komyuniti projek  makim mani inap long K550, 000.

Carolyne Ketsimur i raitim