OL si kukamba o bislama em ol enimal bilong solwara. Skin bilong ol i malumalum. Ol i save hait long ples i daun na long nait ol i save wokabaut raun na kaikai ol pipia long wesan na klinim solwara.

Long Saina na ol arapela kantri long SautIs Asia, ol pipel i save painim dispela abus long kukim na kaikai na sampela taim ol i draim na yusim olsem marasin bilong ol. Long Solomon Ailan, ol i save salim wanpela kilogram bislama long $170 olsem na em i wanpela gutpela rot bilong ol lokal pipel i kisim mani. Ol dispela kantri long Asia i save laikim ol bislama bilong Pasifik na kain kain bislama i gat prais bilong ol yet. Olsem na em i gutpela bisnis bilong ol daiva long ol ailan kantri. Planti ol bisnis bilong ol Saina long Solomon Ailan i save baim bislama na ausait long planti stua i gat ol bikpela sainbot i toksave long ol pablik olsem ol i save baim bislama. I gat ol ripot olsem sampela taim ol baiya bilong Asia i save saplaim fuel na tos na bateri long ol lokal daiva long go painim ol bislama. Dispela bisnis bilong bislama long Pasifik i bin gat planti salens i kamap long en, we long sampela hap saplai i save sot bikos ol pipel i kisim planti tumas na i no givim sans long ol nupela i gro na kisim ples. Stacy Jupiter, Melanesia rijonal dairekta bilong Wildlife Conservation Society, i tok pasin bilong kisim planti bislama tumas i mekim na gavman bilong Solomon Ailan i bin stat putim tambu long dispela bisnis long 2019. “Ol i save go insait na pinisim olgeta bislama long solwara na sotim tru populesen bilong ol,” em i tok. “Long sampela hap ol bislama i save gro gen tasol long sampela hap, i no gat moa bislama i stap.” Long 1 Septemba, gavman bilong Solomon Ailan i givim tokorait long ol pipel i ken kisim bislama gen. Em i givim tokorait bikos COVID-19 i mekim na ol pipel i kisim bikpela hevi tru long ol rot bilong kisim mani. Gavman i tok dispela bisnis bai i op i go inap long Septemba 2022 na i pas gen. Gavman i putim rul bilong wanem kain sais bislama ol pipel i ken kisim, tasol i no gat ol wokman i sambai long sekap long dispela olsem na ol pipel i save kisim long laik. Sampela pipel i komplen olsem ol i no kisim gut mani long bislama bilong ol. Long dispela wik tu Praim Minista bilong Solomon Ailan, Manasseh Sogavare i sutim tok long ol pipel bilong PNG i wok long kalapim boda i go insait long Solomon Ailan long painim bislama. Em i tok PNG i gat COVID-19 na long taim ol pipel i kalapim boda ol inap long bringim dispela sik i go long Solomon Ailan.  “Sampela pipel bilong Bogenvil long PNG i kalapim boda long kisim bislama long hap bilong mipela na ol i bin bungim sampela pipel bilong mipela,” em i tok.