NEW Guinea Islands Produce (NGIP) Agmark i bin tokaut olsem em i mekim mani mak long K3.65 milien bihain long takis long hap yia pinis long Jun 30 2021.

Dispela em bikpela senis bihain long em i bin lusim K828, 902 long Jun 30, 2020. Mani i go insait long kampani i suruk long K58.4 milien i go long K85.9 milien. Dispela bikpela win em risal  bilong kakao plas we i bin kamap long stat bilong dispela yia. Totol Grup revenyu i go antap long 47 pesen bikos i bin gutpela sels i bin kamap long olgeta bisnis bilong Agmark long kantri. Mani bilong kakao divisen i bin go antap long yia 2020 bikos long kakao plus i bin kamap long

dispela taim we i lukim Agmark i ekspotim moa kakao na i mekim mani mak long K30 milien long 2020 na K44 milien long 2021. Ol narapela bisnis we mani bilong ol i kamap gut em Niugini Kopi tin a spais (Agmak Kopi Ekspot Bisnis), Egrikalsa Saplai (Didiman Stoa), Rabtrans (Transpoting na Stivdoring) na Agmark Masineri wantaim JCB masins. Mani we kampani i yusim long ekspens i bin go antap long 20 pesen long 2020. Dispela em bikos long distribiusen kost bilong ekspotim kakao. Sif Opereting opisa na Dairekta, Steven Nightingale i tok Bod i amamas wantaim pefomens na risalt bilong kampani.