BANK South Pacific (BSP) long Vanimo i kamapim wanpela helt senta olsem komyuniti projek long Wes Kos long Wes Sepik Provins. Ol pipel long Lido, Dawaoh na Daunda bai gat sans long yusim gutpela na klinpela helt senta taim ol i sik.

BSP Vanimo tu i givim wanpela bokis ais long ol helt wokmanmeri long putim ol marasin na ol veksin bilong COVID-19. Sif Ekting Opisa bilong Lote Helt Senta Nickson Howie i tok,

“Dispela sevis bai helpim ol pipel bilong Vanimo na Papua Niugini tu.” “Ol pipel tu bai inap long kam na kisim veksin long helpim ol yet long dispela helt senta. Nau mipela i gat bokis ais we isave kisim pawa long sola we bai helpim long sait bilong putim ol marasin, Mista Howie i tok. Mesena bilong BSP Vanimo Delilah Kanit i tok, “Mipela i laik givim ol sevis i go bek long ol komyuniti bilong mipela.

“Mipela tu i no givim sevis long ol pipel tasol mipela i mekim ol narapela samting olsem go green long lukautim envairomen bilong mipela na tu trenim moa long 300 manmmeri  long lukautim mani bilong ol,” Misis Kanit i tok. BSP long Vanimo i mekim 26 Projek olsem komyuniti projek bilong en na mani mak olsem K610,000 ol i yusim long mekim dispela wok long 2009 i kam olsem.