LONG wanpela Aluvial Manining Konprens we i bin kamap long University of Technology long Lae, Minista bilong Maining, Johnson Tuke i bin tok Aluvial Maining bai stap olsem bisnis bilong ol pipel bilong Papua Niugini tasol. Em i tok long maining legislesin we bai go long Palamen long Novemba i bai sapotim aluvial sekta long dispela lo.

“Mi laik putim aluvial maining olsem bisnis bilong ol lokal yet. Ol pipel bilong PNG yet i ken ranim aluvial sekta na mekim mani insait yet long kantri,” Minista  Tuike i tok. Long wankain taim tu Mista Tuke i tok, em i wanbel tu long patnasip bilong ol intanesenel bisnis lain husat i laik involv long dispela bisnis, tasol i mas gat ikwaliti long ol lokal. Mista Tuke i toktok strong long ol lokal long inves long aluvial maining na bringim dispela bisnis i go long narapela mak. Dispela bisnis bai helpim ol pipel long rurel eria husat i stap klostu long ol maining sait. Bai givim sans long ol pipel long mekim liklik mani bilong ol wantaim ol famili bilong ol na senisim sindaun bilong ol.