TWINZA PNG Limited i no laik long sainim praivet agrimen wantaim Steit Negosiesen Tim (SNT) long Twinza i kamap olsem divelopa bilong Pasca A gas projek.

Toktok bilong Pasca A ges projek namel long SNT na Twinza i stop tasol non-disklosa agrimen dap Steit solisita bilong tupela pati bai inap long sainim na lusim wanpela pati aut long taim ol i toktok em sampela infomesen i no bin orait.

TaimTwinza i no laik long sainim dispela agrimen steit wantaim negosiesen tim bilong en i witdroim ol yet long dispela toktok bilong sainim agrimen.

Petrolium Minista Kerenga Kua i no amamas long ol representetiv bilong Twinza long PNG na ol bosman bilong ol long Australia long kam senisim disisen long i no laik sainim agrimen.

Minista Kua i tok gavman nau i laik bringim ol lain bilong mekim disisen long tupela sait wantaim long Twinza na Steit long kam sindaun na toktok gen.

“Gavman nau i kamapim tupela komisen gaidlain long toktok wantaim Twinza. Nambawan em non disklosa agrimen ol i mas sainim namel long 7-pela de we Twinza i no bin laik long sainim.

“Namba tu samting em long mekim ol atoriti long stopim dil na larim ol Twinza opisal mas kam long PNG long bung na stat toktok gen.

“Mipela nidim ful tim bilongTwinza wantaim ol atoriti long pasim dil long 15 Oktoba,” Kua i tok.

Em i tok komisin i stat long mekim rot bilong bringim disaplin na pinisim ol hap samting ol i bin lusim long taim bilong sainim agrimen.

“Sapos wanpela bilong ol dispela komisin i no wanbel bai mipela no inap toktok wantaim ol gen.

“SNT bai no inap engejim ol. Bai steit inap witdroim na sapos dispela samting i kamapim gen Steit bai lukluk long sampela tingting insait long lo,” Minista Kua i tok.

 Joseph Dawai i raitim