OL 14 Jenelis i stap long Pot Mosbi i bin kisim trening bilong sosol midia we Semba bilong Main na Petroleum i bin go pas long en long taim em i holim Enuel Komyuniti Afeas na Midia Woksap bilong en. Trening i bin kamap long wanpela aua we ExxonMobil opereta bilong PNG LNG Projek i bin sponsaim.

Ol patisipen i bin kam long 9-pela media ogenaisesen. Dispela trening i givim ol patisipen skil bilong divelopim sosol midia konten, ol rot bilong stiaim ol na rot bilong kisim na autim gutpela nius long ol pipel.

Media na Komyunikesen Menesa bilong ExxonMobil, Susil Nelson-Kongoi i tok sosol midia pletfom em hap we planti olgeta pipel i save go kisim nius long en tude. Em i tok ExxonMobil i luksave long dispela na i sanap long sapotim Semba long ranim dispela trening. Tude dijital wol i kamap hap bilong mekim bisnis. Olsem na ol midia ogenaisesen long kantri i mas go wantaim dispela senis long bringim aut ol nius na ol isiu i wok long kamap tude yusim teknoloji na sosol midia. Pablik Rilesen na Media Menesa bilong PNG Semba bilong Main na Petroleum, Neville Choi i tok tenkyu long ol Jenelis na ripota long kamap long dispela trening na tok tenkyu long ExxonMobil PNG long sapot bilong en. “Yumi hop long strongim wokbung wantaim bilong yumi olgeta na adastenim hau ol risos sekta i wok long kantri bilong infomim ol pipel,” Mista Choi i tok. Antap long dispela, i bin gat indastri komyuniti afeas na bisnis divelopmen woksap i bin kamap we 90 patisipen i bin kamap long en.