MINISTA bilong Petroleum Kerenga Kua wantaim Siaman bilong Esso PNG P’nyang Limited na Dairekta bilong ExxonMobil PNG, Peter Larden i tokaut long ol bai go het wantaim nigosiesen bilong P’yang projek.

Minista Kua i tok bai gat ol woksap bilong divelopmen bilong P’nyang Gas fil bai kamap long ol wik i kam na sapos olgeta samting i go gut, ol bai sainim P’nyang Het bilong Agrimen long pinis bilong dispela mun na bihain gas agrimen. Peter Larden i tok tingting bilong divelopim P’nyang fil bai givim moa sans bilong groim ikonomi long PNG. Em i tok wantaim dispela patnasip, em bai wok klostu wantaim

PNG gavman na papagraun long go het wantaim P’nyang fil divelopmen proposal na kisim laisens bilong divelopim dispela risos. Diego Fettweis, Oil Search EVP Komesel i tok, “Dispela em gutpela step i go long divelopmen bilong P’nyang gas risos. Em i soim strongpela sapot namel long PRL 3 join vensa na gavman bilong PNG. Em bilong gutpela bilong kantri. Mipela i lukluk long go het wantaim ol nigosiesen na sapotim PRL3 opereta wantaim 38.51 pesen long join vensa.” “Dispela invesmen bai surukim gas paiplain infrastraksa long Westen Provins na bai gat gutpela na bikpela ikonomi impek long PNG na pipel long longpela taim.” Minista Kua i tok.

Carolyne Ketsimur i raitim