MEMBA bilong Saut Bogenvil na Minista bilong Information, Communication and Technology (ICT), Timothy Masiu i bin sainim MoU wantaim Ministri bilong ABG Teknikal sevis long Tunde 24, 2021.

Minista bilong Teknikal Sevis, Trenspot na Sivil Eviesen long ABG Joseph Kim Suwamaru husat i bin kam long Bogenvil wantaim ABG Ekting Sekretri Sione Paasia long sainim dispela MoU. Bihain long Sharp Miting we i bin kamap long Me, 13, 2021 long Pot Mosbi long adresim dro daun bilong pawa long Nesenel level i go long ABG, Ministri bilong ICT i askim NEC long apruvim K50 milien na teknikol sapot i go long Bogenvil ICT dipatmen. Sharp agrimen em wabel namel long Praim Minista, James Marape na Presiden bilong ABG, Ishmael Toroama olsem Bogevil bai i no nap moa nid long pruvim olsem em i strong inap long kisim pawa long Nesenel gavman.

Mista Masiu i tok Gavman bilong PNG i komitet long sapotim Sharp Agrimen long rolim aut ol infrastraksa na sevis na tu redim Bogenvil long kisim ol pawa na wok  bihainim Sharp Agrimen na Konstitiusen bilong PNG na ol narapela lo. Dipatmen bilong ICT, NICTA na NBC i soim olsem  gavman bilong PNG i sapotim Bogenvil bihainim NEC disisen No.101/2021. Minista Suwamaru i tok “Dispela iven i kamap long taim we yumi traim hat long go fowat. Yumi wet longpela taim pinis. Sharp Agrimen i sain pinis na em i taim bilong kisim pawa long han bilong yumi yet. Mi amamas na save olsem PNG gavman bai sapotim yumi long mekim dispela,” Em i tok ICT em i impoten tru long karimaut ol wok na draivim ikonomi. Em i tok tenkyu long Mista Masiu long mekim dispela i kamap tru. Mista Masiu i tok dispela MoU saining em wanpela win bilong ICT dipatmen aninit long lidasip bilong Praim Minista James Marape. “Dispela gavman em bilong mekim wok na lukim wok i karim karim kaikai bilong em. I no bilong toktok tasol, nogat,” Mista Masiu i tok. Em i tok tenkyu long olgeta hatwok wokmanmeri bilong long dipatmen bilong em long kamapim dispela MoU. Em i tok dispela em stat bilong ol wok long kamap. Em i tok tenkyu long Minista Suwamaru na Sekretri long kam long Pot Mosbi na sainim dispela MoU. Mista Masiu i askim Treseri dipatmen long stat givim mani bilong statim wok. Em i askim long mani mak long K50 milien. Em i tok i gat planti wok bilong mekim long Bogenvil, moa yet long Telekomyunikesen sekta. “Mi bai wok strong wantaim ABG minista bilong Teknikol sevis long karimaut ol wok long Bogenvil,” Mista Masiu i tok.

Carolyne Ketsimur i raitim