BRENS Menesa bilong BSP Maunt Hagen, Theresa Pilamp i presentim sek mani inap long K20, 000 i go long Maunt Hagen So Komiti las wik long sapotim namba 61  Maunt Hagen Kalsarel So.

“BSP bank i save promotim kalsa, ol pipel na ol liklik bisnis we i promotim turisim na i strongim ol bisnis long wok bung wantaim na soim ol lokal prodak bilong ol. Mipela i luksave olsem Maunt Hagen, Westen Hailans Provins na ol arapela Hailans rijon em ol i save kontribiut i go long ikonomi bilong PNG wantaim ol infomal maket bilong ol,” Pilamp i tok. “Olsem maltikalserel fainens institiut we i operet long Pasifik na Asia, mipela i laik lukim olsem ol kalsa bilong ol dispela kantri bai divelopim ol prodak na sevis we bai inapim benking nid bilong ol pipel,” em i tok. Menesa bilong So Komiti, John Bonny i tenkim BSP long sapot bilong en long dispela So. “Mipela i tok promis olsem bai dispela So i kamap gut. Wantaim hevi bilong COVID-19, mipela i

daunim namba bilong ol pipel long kamap long dispela So. So bai kamap long Rebiemul graun we

em i liklik eria. Mipela bai krontrolim ol grup manmeri na pikinini,” Mista Bonny i tok.

So bai kamap long Sarere, 4 Septemba i go long Sande 5, Septemba 2021 long Rebiemul.

Carolyne Ketsimur i raitim