PRAIM Minista James Marape na NCD Gavana Powes Parkop i adresim ol praivet sekta long taim Papua Niugini i stat redi long patisipet long Dubai Wol Ekspo we bai kamap long Oktoba 2021.

Long wanpela bikpela amamas kaikai Praim Minista Marape i tok gavman bai mekim olgeta samting em i ken long helpim wok bisnis bilong kantri bilong yumi wantaim Dubai. “I gat ekspo long Dubai em i sans bilong yumi long promotim kantri bilong yumi long invesmen long hap. Ol gutpela bisnis i oporet insait long Papua Niugini na ol i mas givim gutpela invesmen i go bek long ol seaholda,” PM Marape i tok. Gavana Parkop i tok Pot Mosbi em i mausrot bilong kam insait Papua Niugini na yumi mas wok strong long promotim siti. Olsem na gavman na ol praivet sekta mas wok bung wantaim long patisipet long dispela ekspo stat long nau. “Em i impoten olsem Semba bilong Komes i painim rot long patisipet long Dubai ekspo we em impoten long wok bisnis bilong gavman na kantri bilong yumi,” Parkop i tok. PNG bai joinim 392 kantri long dispela ekspo long sokeisim ol prodak wantaim hettok; ‘Bungim tingting, kamapim bihaintaim.’ Nau yet wol i wok long kisim bagarap long pandemik. Dubai Wol Ekspo bai inap kamapim gen ikonomik sans long bungim ol bisnis, investa na bringim nupela tingting long kamapim ikonomi.

Joseph Dawai i raitim