COFFEE Industry Corporation Limited (CICL) i bin makim nupela Siaman bilong Bod bilong en. CICL i tokaut olsem kampani i makim Jerry Kapka olsem nupela Bod Siaman bihain long Patrick Komba i lusim dispela posisen.

Mista Kapka i kisim dispela posisen bihain long Bod ov Dairektas i bin holim wanpela Spesel Jeneral Miting long Pot Mosbi we ol i bin makim em. Mista Kapka i gat moa long 20 krismas ekspiriens long kopi faming, kopi treding na kopi ekspot. Em bai makim Ekspota Kaunsil long bod. “Mi amamas long kisim dispela wok na mi lukluk long bringim dispela indastri i go long narapela level. Ol pipel long kantri i no wok long kisim inap mani long kopi bilong ol. ” Mista Kapka i tok. Em i bin tokaut olsem kopi prodaksen em pundaun long moa long 200,000 bek long wanpela yia, na dispela i mekim bikpela lus long mani mak long K88 milien.