KUMUL Mineral OK Tedi Limited (KMOTL) nau i kisim 67 pesen seaholda bilong OK Tedi Maining Limited (OTML) inap long total kapital bilong K109 milien.

Dispela tok i bin kamap ples klia long taim ol opisol i bin bung long witnesim saining bilong trensfea bilong ol sea long Gavman Haus namel long  las mun. Ol pipel i bin stap long dispela taim em PNG Gavana Jeneral Sir Bob Dadae wantaim Nesenel Ekseketiv Kaunsil (NEC) Deputi Sekreteri Grace So’on, KMOTL Seaman Benny Ninai na KMOTL Sekreteri Francis Lola. Saining bilong sea trensfea i bihainim NEC disisen 285 long deit 19 Ogas, 2020 we i tok orait long trensfea bilong OTML aninit long lidasip

bilong Nesenel Gavman we KMOTL i makim gavman. Saining bilong sea trensfea pepa bilong senisim maining na risos holdings long olgeta maining aset bai nau i go long KMOTL olsem sea holda long rekod bilong 67 pesen sea long OTML na dividen bilong sea bai ol i peim i go long KMOTL. Dispela dividen o win mani bai KMOTL i givim i go long nesenel gavman bikos dividen polisi i tok orait long 50 pesen bilong dividen bai ol i peim i go long nesenel gavman long sapotim nesenel baset. Kumul Mineral bai i gat 33 pesen tasol bilong oporesen na investmen we balens bai ol i peim i go long Sovereign Wealth Fund (SWF) na yusim long sapotim ol komyuniti.

Bod bilong Kumul Minerals i amamas long gutpela wok bai Bod na menesmen bilong OTML i mekim long lukautim gut main. Kumul Minerals i luksave olsem bihain bai wok maining i kamap gut na dispela em i gutpela nius bilong Kumul Minerals na ol narapela seaholda. Kumul Minerals i holim sea bilong Pogera main na bai opim wankain wok long Wafi-Golpu maining projek namel long Bulolo na Huon Galp Distrik long Morobe provins. Ol sea trensfea bilong OTML bai kamap olsem 33 pesen bai bung wantaim sea bilong Westen Provinsal gavman Mineral Risos OK Tedi Namba 2 Limited, Mineral Risos CMCA holdings Limited na Mineral Risos Sta Maunten Limited.

Joseph Dawai i raitim