I N D E P E N D E N T Consumer and C o m p e t i t i o n Commission (ICCC) i tok nogat long askim bilong Link PNG Limited long baim 40 pesen sea long PNG Air aninit long Nasfund.

Long Epril 15, 2021, Link PNG i bin salim aplikesen aninit long seksen 82 bilong ICCC Ekt 2002. ICCC i bin rejisterim dispela aplikesen long Epril 22, 2021 na bihain ol i karimaut proses bilong skelim. Pablik konsaltesen bilong aplikesen i bin stat long Epril 26 2021 na i pinis long Me, 7, 2021. Bihain long konsaltesen i pinis, ICCC i mekim asesmen sanap long infomesen i kam yet long Link PNG, PNG Air na ol arapela stekholda. Tasol bipo long dispela aplikesen, Link PNG i bin askim pas

long baim 60 pesen sea long PNG Air. ICCC i skelim dispela nupela aplikesen na i tok nogat long Link PNG bikos nogut dispela disisen i givim hevi long kompetisen bilong tupela balus. Long aplikesen bilong em, Link PNG i askim long baim dispela 40 pesen sea we Nasfund i gat wantaim PNG Air na long wankain taim traim long kisim 9 pesen long ol narapela seaholda. Total sea em i bin laik baim em 49 pesen. Long asesmen bilong ICCC, em i lukim olsem Link PNG ino bin senisim o tok pait long namba wan askim we ICCC i bin tok nogat pas long em. Ino bin gat nupela infomesen we i ken strongim tingting bilong ICCC long givim sans long Link PNG. Link PNG i tok olsem PNG Air ino mekim gut

mani wantaim sevis bilong em, na wantaim hevi bilong COVID-19 em i ken pundaun isi tru long maket. Olsem na Link PNG i laik bai ICCC i tok orait long askim bilong em bilong mentenim sevis na lukautim wok bilong ol wok lain long PNG Air.