PNG Ports Corporation i givm mani mak olsem K26 milen long Internal Revenue Commission (IRC) olsem takis long Julai 29 insait long Credit Haus long Pot Mosbi las wik Fraide. Minista bilong State Enterprise William Duma i tok, “dispela i soim olsem menesmen bilong PNG Ports em i gutpela tru.”

Siaman bilong PNG Ports Mista Kepas Wali, Komisina bilong IRC Mista Sam Koim na ol wok manmeri bilong PNG Ports i bin stap long dispela bung. Minista Duma i tok, “Ol bisnis bilong stet olsem PNG ports i gat wok long givim mani i go bek long kantri olsem takis o winmani.” Minista Duma i tok, “Makim maus bilong gavman bilong yumi, mi laik tok tenkyu long menesmen bilong PNG Ports long givim bikpela mani we bai helpim gavman long givim sevis

long ol pipel. Bikpela pandemik i kamap em i no stopim PNG Ports long mekim wok bisnis. Namel long ol dispela samting i kamap PNG Ports i mekim gut tru. Komisina Koim i tok bikpela amamas long Menesmen bilong PNG Pots. “Dispela em i namba tu taim yupela i givim bikpela mani i go olsem takis long IRC,” Komisina Koim i tok. Komisina Koim i tok, “Ol narapela bisnis bilong stet i painim hat liklik long wok, ol i gat dinau wantaim IRC long mani mak olsem K700 milen. PNG Ports em i no stap insait long dispela na mi amamas na laikim yupela i ken mekim ol dispela gutplea wok moa yet. “Pastaim long mi kam long dispela bung mi sekim ol ripot na lukim olsem PNG Pots i orait wantaim IRC long sait bilong takis,” Komisina Koim i tok.

Samantha Solomon i raitim