INSAIT long foapela mun tasol Building Resilient Communities in Madang (BRCM) projek bilong World Vision PNG i pulim planti interes pinis long rais faming long provins.

BRCM em i gat wokmak long mekim dispela wok long sikispela mun tasol em i winim bel bilong ol pipel pinis. Long Rempi, Sumgilbar LLG long Not Kos rot wanpela liklik komyuniti i kisim helpim long sanapim ol neseri plot bilong rais,

planim rais na havest. Bihain ol i milim o rausim skin bilong rais na pekim long ol wan kilogram paket. Nem bilong rais em Magic Marasin. “Nem magic marasin em i stat long Josephstahl long ol yia long 1990. Mipela i yusim tasol dispela nem na bihain bai mipela i kolim rais bilong mipela, ‘All-In-One’. Tonny, wanpela rais fama long Rempi husat i kisim ol trening aninit long BRCM i wok hat long kirapim interes bilong ol komyuniti long joinim projek. Em i gat klostu 200 ektiv kontek fama husat i wok klostu wantaim em. Ol kontek fama bilong Tonny i kisim trening long rais kaltivesen wantaim teknikol sapot bilong Dipatmen bilong Egrikalsa na Laipstok (DAL) na edvais bilong rais long Nesenel Egrikalsa Risets Institut (NARI). Dispela wok patnasip namel long World Vision na DAL na NARI i kamapim planti interes long ol komyuniti long apim sindaun bilong na abrusim ol hevi we klaimet senis i bringim. Mary Lilih bilong DAL Madang i tok, em i gutpela dispela patnasip i kamap long wanem mipela i nogat mani long sapotim ol fama long dispela taim. Misis Lilih i tok bikos mani i sot ol fud krop opisa i save wok wan wan taim tasol na long taim ol i kisim askim long helpim long ol trening. DAL Madang i save helpim tu long tilim ol sid bilong ol fud krop we NARI i kamapim tasol mipela

i no save lainim ol fama long hau bilong planim na lukautim, Misis Lilih i tok. Wanpela narapela fama trena em Mary. Maski Mary i kisim trening pinis long pasin bilong pulim wara i go insait long rais gaden bilong em long planim rais long tais wara, Mary i senis na trenim ol fama long planim rais long drai graun. Em i tok em i isi long planim rais long drai graun long wanem em i nogat planti wok long en na tu planti fama i laikim dispela pasin bilong planim rais. Mary i stat trenim ol fama long planim rais long drai graun stat long 2003 yet. Wantaim liklik mani e mi kisim, Mary i save trenim ol model fama na ol i ken i go na serim ol skil na save bilong ol. Em i tok dispela pasin bilong serim skil na save i no wok gut olsem na nau e mi wok wantaim ol klen grup. “Mipela i gat wanpela model rais mil we mipela i save karim raun

long ol komyuniti long sapotim ol long rausim skin bilong rais bilong ol,” Mary i tok. Em i tok moa olsem long taim bilong ileksen ol kendidet na memba bilong palamen i save givim aut planti rais mil tasol ol i save stap longpela taim long wanem ol fama i no kisim trening long hau bilong yusim ol masin. BRCM projek em i wok wantaim ol fama long 15 komyuniti long Madang Provins. Dispela projek em i ran long tupela yia, stat long dispela yia na pinis neks yia. Astingting em long inapim ol pipel wantaim infomesen bilong helpim sindaun bilong ol insait long taim bilong klaimet senis. World Vision i laik lukim tu olsem ol lain i kisim helpim aninit long BRCM projek i yusim ol infomesen bilong klaimet senis na disasta infomesen long senisim pasin bilong ol long kamapim kaikai bilong lukautim ol yet na ol i ken lukautim ol yet long taim nogut.