Carolyne Ketsimur i raitim NATIONAL Superannuation Fund (Nasfund) em i namba wan supaenuesen
kampani long sanapim opis bilong en long Maprik Distrik long Is Sepik Provins.

Nau ol pipel long Is sepik i
ken eksesim sevis long Maprik Sevis Senta. Siaman bilong Nasfund Charles Vee i bin opim dispela opis.
Na em i tok, “Wantaim dispela Nasfund brens, ol pipel long Maprik distrik i ken gat ekses long
supaenuesen seiving na dinau sevis. Dispela nupela brens bai wok wantaim narapela brens we i stap
long Wewak.” “Dispela em bikpela wokabaut bilong Nasfund bihain long em i bin sainim MoU long
Disemba 2020 wantaim Is Sepik Provinsal Gavman. Bai tupela pati i wokbung wantaim long givim
fainensal litresi na ol sans bilong invesmen long Sepik,” Mista Vee i tok. Long ol yia i go pinis, Maprik i
gro long kamap bikpela ikonomik eria long Is Sepik Provins. Dispela divelopmen i kamap bilong sapotim
egrikalsa long eria wantaim tred bilong vanila, kakao na kopra. Ol fama na ol famili i save kisim bikpela
mani na tu bikpela mani i raun insait long distrik. Olsem na Nasfund i sanapim brens bilong en long
dispela eria long promotim pasin bilong sevim mani we bai ol pipel i ken yusim long taim bihain. Tim i
stap pinis long eria na givim infomesen long ol pipel na ol i lukim gutpela autkam. Wantaim dispela sevis,
ol pipel long Maprik i ken eksesim sevis long ai do bilong ol.