KOKODA Track Authority (KTA) i tokaut olsem ol renja tim bilong ol bai kisim trening aninit long Papua
Niugini na Australia patnasip program.

KTA Renja kepesiti divelopmen projek bai trenim ol 14 renja
husat bai wok wantaim 6-pela renja i stap pinis. Ol bai wok wantaim long menesim na mentenim Kokoda
Trek, lukautim baiodaivesiti na sevim ol impoten kalsarel na militeri samting. Ekting Sif Ekseketiv Opisa
bilong KTA, Julius Wargirai i tok long apim namba bilong ol KTA renja na givim ol trening bai impruvim na
strongim menesmen bilong Kokoda trek. Program i op long ol man na meri wantaim husat i gat save, skil
na kwaliti bilong kamap renja.
“Em i namba wan taim bilong KTA long kisim ol meri long wok olsem renja. KTA i luksave long impotens
bilong balensim man na meri wantaim,” Mista Wargirai i tok. Em i tok moa olsem ol KTA renja bai gat
planti kain kain wok bilong lukautim envairomen, promotim turisim na lukautim ol militari samting long
Kokoda. Ol bai wok wantaim ol patna olsem, Konsevesen na Envairomen Proteksen Atoriti, Turisim
Promosen Atoriti na Nesenel Museum At na Galeri. Sampela wok bilong bilong ol em long kliaim bus,
stretim ol bus rot na bildim ol bris bilong wokabaut na long wankain taim wok wantaim ol komyuniti
long luksave long ol lokal nid bilong projek plening. Wanpela lida man bilong Kagi i tok em i amamas long
dispela projek bikos planti komyuniti bilong Kokoda trek bai benefit long en. Em i tok planti manmeri
long komyuniti i soim intres long kamap renja. Na em i hop long lukim ol nupela renja i kam long ol lokal
komyuniti. Trening bilong ol renja bai kamap insait long klasrum na arasait long fil we ol ekspirens
woklain bilong narapela kantri bai go pas long en. Besik trening bai karamapim trek mentenens, namba
wan eid, senso operesen, ripoting na monitaring bilong kem sait, geshaus na militari sait. Ol sumatin i
wokim gut long trening bai go insait long namba tu yia bilong edvens trening. Ol edvens greduet bai
kisim setifiket bilong Konsevesen na Graun Menesmen.