BIPO Deputi Edministreta Veronica Jigede i kisim posisen bilong Siameri bilong Nu Ailan Turisim Atoriti. Provinsal Ekseketiv Kaunsil yet i bin mekim dispela apoinmen long wanpela miting long Julai.

Nu Ailan Turisim Atoriti i stap long lukaut bilong Nu Ailan Atoriti Ekt (2008) we ol i bin mekim sampela senis long 2011.

Jigede i gat MBA long Edministresen Divelopmen na Basela long Bisnis long Charles Darwin University. Komyuniti bilong em i save rispektim em gut na em i gat bikpela save long pablik sevis bihain long em i holim ol bikpela posisen long Namatanai na Kavieng. Em i bin sevim ol sosol na komyuniti divelopmen posisen long Vanimo na Manus.

Jigede i amamas long kisim dispela wok na em i tok em bai mekim gut wok bilong em long lukim Nu Ailan Turisim Atoriti i kamap gut.

“Nu Ailan em i naispela ples na i gat planti gutpela ofa bilong turisim, tasol yumi mas putim ol gaidlain long helpim ol turis na tu lukautim ol kalsa na kastom bilong yumi,” Misis Jigede i tok.

Em i tok pasin na tingting bilong ol pipel tu i mas senis long lukautim pablik pes bilong Kavieng na Namatanai taun. Nu Ailan i mas stap fri na klin. Ol pipel i mas kisim turisim olsem bikpela samting,” em i tok.

Wantaim apgret bilong Kavieng ples balus i go long Intenesenel level, provins bai lukim gutpela autkam bilong dispela divelopmen taim em i pinis neks yia.