LONG Tunde Julai 19, 2021, ol nupela bod memba bilong Forest sekta i bin mekim tok promis long mekim wok bilong ol olsem ol Bod memba bilong Forest sekta.

Dispela Bod i gat 9-pela representetiv bilong wan wan dipatmen we 6-pela makim.

Ol i mekim tok promis long wanpela bung long APEC haus na 3-pela em ol olpela bod memba husat i bin mekim tok promis pinis. Ol dispela bod memba em Bart Ipambonj, Gunther Joku, Koney Samuel, John Mosoro, Keith Iduhu, Shirley Launa, Steven Yanopa, Sebastine Miyoni na Bob Tate.

Bihain long ol dispela bod memba i bin mekim tok promis bilong ol, olgeta i bung na makim nupela Siaman bilong Forestri husat em Keith Iduhu na Deputi bilong em Bart Ipamboj.

Minista bilong Forestri Walter Schnaubelt i tok Forest sekta i nidim planti impruvmen long planti eria olsem na em i bin tokaut long driman bilong em long senisim wok bilong Forest sekta.

Em i tok Forest indastri i ken kontribiut bikpela i go long ikonomi bilong PNG sapos i gat impruvmen long wok bilong em.

Nupela Siaman bilong Nesenel Bod Keith Iduhu i tok em i amamas tru long kisim dispela sans long kamap Siaman na em i tok tenkyu long ol Bod memba long gat luksave long makim em.

“Wok bilong mi nau long lukim olsem Bod i mas bihainim ol lo bilong Forest Ekt na wok klostu wantaim Minista bilong Forest long karimaut ol driman bilong em long mekim Forest sekta i kamap gut,” Siaman Iduhu i tok.

Long makim Marape-Basil Gavman, Minista bilong Forest Walter Schnaubelt i tok Forest em i  bikpela eria we i nidim bikpela wok long em.  Em i tok amamas long nupela Siaman na Deputi bilong en long kisim ol dispela posisen long Nesenel Forest Bod.

Carolyne Ketsimur i raitim