NATIONAL Information and Communication Technology Authority of Papua New Guinea (NICTA) i givim nupela laisens i go long Niugini Media Limited na Digicel long Julai 16 2021 bihain long olpela laisens bilong tupela i pinis bihain long 10-pela yia.

Minista bilong Infomesen na Komyunikesen Timothy Masiu i givim tupela laisens i go long Chief Executive Officer (CEO) bilong Digicel Colin Stone bilong wok narapela 15 yia.  Na CEO bilong Niugini Media Limited Mis Lesieli Vate long wok narapela 10 pela yia insait long NICTA haus long Pot Mosbi.

Minista Masiu i tok em i amamas long EMTV olsem wanpela longtaim televisen stesin.Tasol em i tok, em i laikim olsem EMTV i mas givim ol stori bilong ol lokal ektiviti.

Minista Masiu i tok, “EMTV yupela i bin mekim gut long kantri na yupela i gat bikpela namba manmeri i wok long lukim ol samting yuplela i save soim na mi amamas tru long givim laisens bilong mekim dispela wok long narapela 10-pela yia gen.”

Mis Vate i tok tenkyu long Minista na ol wok manmeri bilong NICTA long givim narapela nupela laisens gen long mekim wok  bilong givim infomesen na nius long ol pipel.

Mis Vate, ”Mipela i amamas long soim ol program olsem nius na spot long ol man na meri bilong Papua Niugini.”

Samantha Solomon i raitim