LAS wik PNG Power Limited i bin sainim kontrak wantaim Tibean Electrical Group Limited (TBEA) long karimaut wok bilong pawa saplai long Tari i go long Hides hai voltej trensmisen lain.
Dispela wok i kam aninit long Gavman bilong Marape we i stap insait long stratejik taget bilong PNG Divelopmen Stratejik Plen 2010 i go long 2030. Dispela plen i lukluk long tupela samting. Em long;
- Elektrifikesen- Ol 70 pesen populesen bilong PNG bai gat ekses long gutpela pawa saplai we olgeta i ken inap long baim long 2030.
- Nesenel Grid- Olgeta bikpela taun na siti bai stap insait long Nesenel grid.
Mani mak bilong dispela projek inap long K71 milien we kost bilong graun, tawa beis peimen na kompensesen i stap insait long en. Gavman bilong PNG yet bai fandim dispela projek. Dispela em namba wan taim bilong PNG long gat bikpela pawa saplai i ran insait long kantri.
“Dispela trensmisen lain long Tari i go long Hides i no bin stap long namba wan skop bilong Hap 1 na 2 bilong Nesenel Pawa Grid Divelopmen Projek. Marape Gavman long NEC disisen Namba 136/2020 long Me, 13, 2020 i bin tok orait long Tari-Hides link long stap insait long skop bilong namba tu 2 hap bilong Nesenel Pawa Grid Divelopmen Projek,” Minista bilong Stet Entaprais, William Duma i tok.
TBEA em kampani bilong China we i gat bikpela ekspiriens long pawa trensmisen. Ol i save karimaut wok bilong pawa trensfomesen long China na ol narapela kantri long wol. TBEA i bin mekim namba wan hap bilong dispela wok na kampani bai go hetim wok bilong konektim Tari na Hides we bai linkim olgeta provins long Hailans rijon bihain go long Momase na long taim bihain Niugini Ailans.
“Mi bilip bai dispela projek i kontribiut i go long driman bilong PNG Gavman long givim pawa long 70 pesen pipel long kantri. Namba wan hap bilong dispela projek we TBEA i bin karimaut i pinis gut,” Embeseda bilong China long PNG, Zeng Fanhui i tok.
Siaman bilong PNG Power, Moses Maladina i tok makim PNG Power em i tok tenkyu long gavman long dispela sans, nae m i tok tenkyu long gavman na pipel bilong China long patnasip bilong ol long dispela projek. Na tu TBEA long teknikal wok bilong dispela projek.
Praim Minista James Marape i bin mekim tok klia olsem dispela projek i no bilong pipel bilong Tari tasol, nogat. Dispela em Nesenel strateji we bai givim pawa long 60 pesen populesen bilong kantri na 70 pesen long ikonomi bilong kantri. Em i tok tenkyu long ExxonMobil husat em divelopa bilong gas we bai givim pawa saplai long kantri.
Carolyne Ketsimur i raitim
wantokniuspepa.com