“TEKNOLOJI i wo klong mekim bikpela senis long rot bilong mekim bisnis. Em i kamap wanpela impoten samting tru long sosaiti bikos em impruvim bisnis na kamapim planti gutpela samting long hau bisnis i operet.”

Minista bilong Infomesen, Komyunikesen na Teknoloji, Timothy Masiu i bin mekim dispela toktok long taim em i bin go opim Certified Practising Accountants PNG (CPA PNG) NGI brens 2021 enuel konprens long Kokopo long Is Nu Briten Provins.

Long toktok bilong em, Mista Masiu i bin tokaut long hau Teknoloji i senis long 1990 i kam inap tude. Planti senis i kamap na planti bisnis nau i wok long kamap gut bikos long teknoloji.

Long makim Nesenel Gavman, wok bilong em olsem Minista bilong Infomesen, Komyunikesen na Teknoloji nau long lukluk long dispela  na senisim pablik sekta long go insait long onlain sevis na sevim ol pipel.

Mista Masiu i bin tokaut olsem Ministri bilong em i mekim draft bilong propos Dijital Gavman Bil pinis. Dispela Bil bai strongim Dijital Trensfomesen Polisi na bai opim rot bilong ol bisnis haus na SME long gat ekses long pablik data we bai helpim ol long karimaut ol prodak na sevis bilong ol.

Em i mekim ol dispela toktok sanap long het tok bilong Konperens “The Digital Revolution-Impact on Business and the Economy” o “Ol senis we teknoloji i bringim long ol bisnis na ikonomi”

Em i tok tenkyu long CPA PNG NGI Brens long singautim em i go long dispela Konferens.

Carolyne Ketsimur i raitim