EUROPEAN Union Sapot Long Rurel Bisnis, Invesmen na Tred (EU-STREIT) i wok long mekim planti gutpela wok long Sepik provins. Antap long ol program bilong helpim ol rurel komyuniti long planim kakao, vanila na pis fam, program i go moa yet na stretim ol 16 bagarap rot long mak bilong 248.10 kilomita.

Ol dispela rot i konek wantaim ol eria we i gat bikpela prodaksen bilong kakao, vanila na fiseris. Bikos rot i bagarap tru, ol pipel i painim hat long bringim ol kakao, vanila na pis long maket.

EU-STREIT PNG nau i lukluk long apgredim ol rot, bris, jetis nap les balus wantaim helpim bilong International Labour Organization (ILO). Astingting bilong dispela wok em long kamapim gutpela envairomen bilong ol fama long mekim moa mani na patisipet long ol bikpela maket aninit long veliu sen we program i sapotim.

Long dispela projek, ILO bai trenim ol lokal pipel na givim wok long ol bai ol yet i ken wok aninit long dispela projek bilong stretim rot. Ol kain wok olsem klinim na kliaim rot long abrusim ol hevi i ken kamap long taim bilong ren na trefik.

Dispela projek bai kirapim bek ol olpela rot, daunim eksiden long ol dispela rot na givim wok long ol lokal pipel.

ILO tim aninit long EU-STREIT i trenim pinis 126 pipel i stap long ples klostu long ol dispela rot. Ol i stap aninit long Rot Mentenens Grup. Dispela grup i gat 51 pesen meri na 49 pesesn we 36 pesen bilong ol em ol yut.

Ol wido, na ol mama nogat man na ol trangu lain i kisim bikpela sans long kamap hap bilong program. Dispela i kamap bilong serim wok namel long olgeta pipel bai olgeta i ken benefit wantaim.

Carolyne Ketsimur i raitim