ANINIT long EU-STREIT Program, FAO i wokbung wantaim National Fisheries Authority (NFA) long givim moa save long ol gavman fiseris opisa long PNG.

Long Letter ov Agreement (LOA) we Menesing Dairekta bilong NFA, John Kasu na Kantri Het bilong FAO, Ken Shimizu, EU-STREIT i sapotim na givim moa save na skil long 14 gavman fiseris opisa insait long 10 wik trening long National Fisheries College (NFC) long  Kavieng.

Long dispela 14 opisa, 10-pela i statim pinis Setifiket 1 long Akwakalsa (skul bilong laip bilong solwara) trening na 4-pela bai kisim Setifiket 2 bilong Small Fishing Operations (SFO) trening we bai stat long Ogas 2021.

Ol dispela patisipen i kam long 10-pela distrik long Is na Wes Sepik Provins.

Astingting bilong dispela wokbung wantaim em long givim moa save long ol opisa bilong fiseris long operesen bilong akwakalsa bai ol i ken givim trening na woksap long kepesiti bilding bilong fiseris na akwakalsa long ol fama o bisnis lain.

Long wankain taim dispela trening  bai helpim ol opisa long  gat moa save na skil bilong luksave long ol rot na teknik bilong impruvim sevis bilong fiseris na tagetim ol lain i ken benefit long dispela program.

“Ol dispela opisa bai kisim trening pinis na go bek gen long ol rurel eria long Is na Wes Sepik na skulim ol fama long impruvim kwaliti bilong ol pis prodak we ol i ken kisim bikpela mani long en na bringim  gutpela sindaun long ol komyuniti bilong ol. Na long wankain taim strongim fud sekyuriti long wan wan haus,” EU-STREIT Intenesenel Fiseris speselis, Francisco Noble i tok.

Tupela patisipen, Junnel Yendo, 27 na Philemon Maino, 32 bilong Yangoru Saussia Distrik long Is Sepik i tok trening i helpim ol gut. Ol i lainim planti nupela samting na ol i amamas.

“Taim mi pinis long trening bai mi i go bek na skulim ol fama long ples,” Mista Maino i tok.

“Wanpela hevi we ol fama i save painim em rot bilog famim pis. Bihain long dispela trening bai mi ken go bek na skulim ol long impruvim rot bilong famim pis,” Misis Yendo i tok.

Carolyne Ketsimur i raitim