WES Nu Briten, Australia na Niu Silan bai wok wantaim long divelopim maket long Kimbe taun long mekim moa rum bilong ol venda long salim ol samting bilong ol.

Nu Silan i bin tokaut olsem em bai wok wantaim Kimbe taun na kontribiut i go long ol komyuniti. Ol i soim disain bilong divelopmen long ol pipel na Hai Komisina bilong Australia Jon Philp i tok “impruvmen na menesmen bilong maket bai bringim planti visita na venda i kam long dispela maket na dispela bai kontribiut bikpela tru i go long ikonomi bilong Wes Nu Briten”.

Em i tok dispela impruvmen bai seif long ol maket meri husat i makim 80 pesen bilong ol venda.

Nupela fasiliti konstraksen bai inapim 700 venda na moa rum we ol venda i ken yusim long maket. Bai gat gutpela wara na sekyuriti we seif long ol venda.

Australia,  Nu Silan na Wes Nu Briten Provinsal gavman yet bai fandim dispela divelopmen. Wantaim Australia i kontribiut long K13 milien, Nu Silan K11 milien na Memba bilong Wes Nu Briten Sasindran Muthuvel i kontribiutim K5 milien we i kam long Provinsal Sevis Impruvmen Program (PSIP).

Memba Muthuvel i tok tenkyu long Australia na Niu Silan long bikpela sapot bilong ol. Em i tok ol pipel bilong Wes Nu Briten i amamas tru long dispela wokbung wantaim.

Carolyne Ketsimur i raitim